搞搞政：縱容泛民拉布 建制唔妥張宇人

長者生活津貼無法喺十月突圍，外間除對有份阻撓嘅工聯會大表不滿之外，立法會財委會主席張宇人都被指有責任，據講，建制派議員同政府都對佢主持會議有微言，覺得佢矯枉過正，議員發言超時又冇及時煞停，去到第二輪發言時又唔識收緊發言時間，暗示泛民拉布，張宇人就縱容。甚至有建制派議員後悔揀佢做財會主席。

四十萬長者少攞一個月津貼，民間不乏搵真兇嘅呼聲，其實建制派當初支持張宇人做財委會主席，都係唔想重演上屆主席劉慧卿經常容忍議員拉布嘅情況，點知張宇人都唔好得幾多，民建聯喺前晚財委會已感覺到唔對路，休息時就捉住佢密斟，要求開通宵會、縮短議員發言時間等，但張懶理，話有議員反對就唔可以開通宵，又話有「先例」試過係經過幾輪發言後先至會縮減發言時間。

班建制派對此好不滿，事關Tommy上屆都係泛民主派「拉布」下嘅受害者，點解一做主席就容許「拉布」呢？建仔議員明日會喺財委會上提出「剪布」動議，點知張宇人又以無先例為由，諗住喺個動議前加插辯論喎，呢場拉布、剪布戰睇怕又有得鬥！