政壇：經民聯唔畀梁美芬掂法律
由七位工商界同專業界別議員組成嘅經濟民生聯盟（經民聯），主席梁君彥尋日公布各政策範疇嘅發言人，奇怪嘅係司法發言人竟然唔係由立法會司法及法律事務委員會主席梁美芬（梁博士）擔任，而係搵咗地產及建造界議員石禮謙（大舊石）做。睇嚟唔止建制派，就連經民聯內部都唔想梁博士掂啲司法嘢喎。
梁君彥解釋，大舊石依家喺城市大學攻讀緊法學博士，絕對有資格講司法議題喎。冇記錯嘅話，梁博士喺城大有份教法律，石禮謙咪係佢入室弟子？梁博士就點都唔肯講有冇教過大舊石。咁梁博士負責邊瓣呢﹖佢做食物安全、環境衛生政策發言人，簡單啲講，即係繼續叫佢捉老鼠囉。睇番份政策發言人名單，原來副主席林健鋒完全冇影，梁君彥話林健鋒做咗行會成員後，意見只能夠代表自己同行會，費事佢亂講嘢影響經民聯立場喎！
喺城大教法律嘅梁美芬唔肯講有冇教過石禮謙。（資料圖片）