政壇：烏龍鍾樹根改姓賴

新一屆立法會開工唔夠一個月，來自建仔嘅新丁議員鍾樹根已經有跑出之勢，不過佢跑出唔係因為議政能力佳，反而係因為太多大烏龍、小失誤，甚至喺辯論時亂拋書包講錯成語，搞到畀政壇對手同網民針對。犯錯本來都係學習扭轉危機嘅好機會，但上次寫錯中華人民共和國英文、搞出港獨事件時，鍾樹根已經賴人，今次facebook又一日三出錯，佢雖然認打錯字，但又話唔知點解超連結去咗澳門立法會，咁嘅解畫手法真係令人無語！

網民高度關注

今時今日議會雖然早已經走向平民化，但議員嘅工作攸關萬千市民福祉，議員嘅個人能力同議政能力都好重要，曾經放洋留學、有雙碩士學位嘅鍾樹根貴為建仔嘅重點培訓對象，但繼早前印錯卡片、畀我哋獨家踢爆佢疑似港獨之後，佢又再頻頻失誤，一陣唔識「子虛烏有」、一陣又被網民踢爆佢將「焚書坑儒」打成「焚書坑孺」。

連環出醜下，佢亦成為網民高度關注嘅對象，前兩日再畀人發現佢喺社交網站facebook度一日三錯，包括打錯字話自己喺「主法會」工作、又將自己工作嘅立法會無啦啦連結咗去「澳門立法會」。佢尋日解畫時話，當選立法會議員後已將工作一欄填「立法會議員」，不過就唔小心打咗「主法會」，後來改番「立法會」後又唔知點解自動超連結去澳門嘅立法會喎，總之，聽得最多嘅係「唔知點解……」

不過，畀網民改咗個「tree gun」花名嘅樹根都話，自己做咗議員大家先對佢忽然關注，尋日已經因應連串事件，特登同同事開會，以後會叫同事幫手睇緊啲咁話。呢句說話嘅潛台詞仍然係同事唔小心，佢有冇諗過，如果自己小心啲，呢啲錯仲會出現咩﹖