懶官護地慢過龜 魔爪入侵生態危　　

唉，港產官僚幾時至頑石點頭，戒甩踢一踢先至郁一郁嘅大食懶作風呀？

環保團體早前踢爆，西貢白沙澳被發展商嘅魔爪悄悄入侵，農地被暗中收購，濕地被挖掘破壞，生態被肆意摧殘，一場被喻為大浪西灣翻版嘅生態災難一觸即發。嗱嗱嗱，瞌緊眼瞓嘅官老爺可能被人一腳踢醒咗啦，日前急急刊憲，話打算將大浪西灣、圓墩同金山三幅尚未規劃嘅邊陲土地納入郊野公園範圍。即係話，三幅土地日後由政府管理同保育，再次無聲無息淪為富豪私人俱樂部嘅機會應可減低。

你話港產官僚係咪賤骨頭吖，唔踢唔郁！如果唔係環保團體踢爆，一腳踢醒夢中人，呢班大懶蛇官僚恐怕已提早進入冬眠狀態咯，仲邊記得守護生態寶地？一葉知秋，官場蛇王懶到出汁，靠佢哋保護環境，睇怕都係緣木求魚咯。

太一叮唔係杞人憂天o架，環保官僚踢一踢郁一郁，即係話你唔踢佢哋嗰陣，佢哋直頭郁都唔郁，死蛇爛鱔。嗱，兩年幾前爆出大浪西灣風波之後，當局明明承諾將全港五十四幅郊野公園毗鄰土地盡快納入法定圖則，結果大浪西灣到家陣至脫離無王管狀態，而其他獲處理嘅土地亦只係得廿幅左右咁大把。即係仲有超過三十幅未郁過，慢動作到呢，仲慢過濕地入面嘅烏龜呀！

叮你個鎯鎯，港產官僚唔好咁敷衍塞責得唔得？明知風光明媚嘅生態土地隨時落入魔爪，處理過程居然唔嗲唔吊，慢過龜爬，環保官僚究竟係保護環境，定摧殘環境呀？

所以咯喎，環保人士就質疑嘞，港府龜速審批土地，全因向發展商同原居民傾斜：「政府淨係凍結土地用途同宣布納入發展審批地區圖，都無細分規劃用途，三個月乜都做晒啦，唔明點解三幅地搞成兩年幾，除非佢要畀時間其他人做嘢！」

喂，過氣特首曾蔭權搞「曾商勾結」，已經搞到天怒人怨，如果港產官僚青出於藍，唔止搞官商勾結，仲搞埋官鄉勾結，咁仲得了嘅？咪話香港人唔會放過你哋，生態土地入面嘅瀕危生物都會出來抗爭啦，叮！

頑石都會點頭，各位港產官僚，你哋唔通比郊野公園入面啲千年頑石更不如？快手快腳保護生態土地啦，唔係嘅話，盞畀市民剷到飛起o架咋！