SUN世代:贏口碑 「食」住上

災難中逃生是人的本性,飲食集團董事梅慶豐(Jeffrey)卻偏向難度挑戰。他大膽在金融海嘯中創業,更大膽不做宣傳,相信只要食物有質素,就有口碑,就有客人賞識。終於,口碑令生意愈滾愈大,集團旗下餐廳短短三年間由一變七,並帶着知己知彼的智慧,成功在大氣候的逆流中拾級而上。

甚麼人會將「做生意」放在我的志願?二十六歲的Jeffrey出生於製衣大家族,父親是中華廠商聯合會會董梅應春,他自小就看着父親打理生意。「可能好多人想做醫生、律師,但我無一個範疇想做,只諗住大個咗,我要做生意。」一念無限,他一步步朝向商人方向邁進。

雖以當商人為目標,但Jeffrey從沒打算繼承父親的生意,在美國讀大學時,他亦特意選擇學院內有關金融及市場的科目,銳意回港大展拳腳。「用晒以前打暑期工賺嘅錢、細個啲利是錢,同兩位朋友夾份,開咗第一間西餐廳,主打新派意大利菜!」創業那年是○九年四月,正值全球經濟剛經歷金融海嘯吞噬,仍未復原的時期,「當年好多餐廳相繼執笠,我亦有啲緊張,但我有信心會突破到。」

信心源自認真,他在開業之前,四出試食,展開「尋找廚神之旅」,終於找到一位奧地利籍大廚,兩人一拍即合:「佢曾經喺香港有餐廳,我同佢嘅飲食業意念好似,同樣覺得好嘅材料先可以留住客人,我唔介意食材用多啲成本,後來證明呢個決定係無錯!」

開業不久,他的餐廳在癱瘓的飲食業之中突圍而出。「除咗開業第一日,之後一個月已經Full booking,多得親友、散客,食完之後幫我宣傳,一傳十,十傳百,好多人都想嚟試,開業三年幾,依家仲係日日預訂滿額。」

成功之道,全因夠膽反傳統。「我唔做Marketing o架!」他大爆獨特的營銷之道。他拒絕重金豪裝餐廳或推出密集式廣告,反而將一切歸於飲食業的基本:「我只重視食物質素!」他又在酒水上「做手腳」:「我間餐廳唔算好大,但存有九百個牌子嘅酒,價格唔高,就係針對香港好多餐廳鍾意將酒嘅價格Set到好高,我將心比己,邊個想咁貴去買酒?」

這次創業之旅,取得空前成功。經歷這次小試牛刀,他不諱言有意再接再厲,甚至進軍飲食業以外的行業:「好多嘢都想試,始終仲後生,最近更加入廠商會,希望擴闊眼界!」有了這個雄心,他的事業該會愈飛愈高。

Jeffrey's 小檔案

現職:Drawing Room Concepts創辦人及董事

學歷:美國康奈爾大學酒店管理學院學士

興趣:旅遊、美式足球

第一手消息請下載on.cc東方互動iPhone/iPad/Android/Windows Phone Apps

李嘉行

梅慶豐勇字當頭,在金融海嘯期間創業。

兒時的Jeffrey在母親懷抱,十分趣緻。

Jeffrey熱愛美式足球,每當落場比賽必定全力以赴。

Jeffrey與前皇馬球星沙加度(左)分屬好友。

Jeffrey(右二)邀請好友吳永嘉(左起),查毅超、施榮懷及施榮恒(右一)到自家餐廳敍舊。