政壇：政商定格：高永文怕咗乒乓孖寶

食物及衞生局局長高永文尋日出席「傑出青年協會傑青健體嘉年華」，喺台上同一眾傑青拉完筋做完熱身，落台就同記者一齊「想當年」，原來佢當年仲係學生哥嘅時候主力踢波同打乒乓波，雖則打波技術未必係最精，但打波策略喇喎，佢都有番兩招o架，咁啱尋日「乒乓孖寶」李靜同高禮澤都在場，咁好機會梗係要「高手過招」啦，但高醫生就話費事獻醜而婉拒。

高醫生解釋，做運動最緊要係符合自己興趣同體能，就好似佢咁，依家已做唔到劇烈運動，所以就轉而行山，仲大力推銷行山觀鳥都係運動嘅一種。佢仲話有時為咗睇雀，仲會不惜爬樹添！

高永文（左二）唔敢同乒乓孖寶打波，惟有拖住○七年傑青羅寶文（右二）手仔拉拉筋。