政壇：政商定格：手袋救星急援唐貝詩
「手袋救星」旭新社創辦人Anson潘穎安，由職業足球員轉行做皮具清潔復修，睇遍手袋嘅疑難雜症，佢話好多人家中收埋好多污糟失色手袋，但未至於破損，只係唔知點保養護理。難怪團購網站「喵擊」行政總裁助理、名媛寇鴻萍嘅大女Lydia唐貝詩都搵佢合作，搞超平團購益吓城中姊妹。
早前Lydia特登拎住七、八個名牌手袋及銀包去搵Anson急救。佢話Anson係行內始創者兼一哥，所以摷晒家中舊手袋去大變身，仲打算拍住旭新社搞團購，頭炮係原價出售嘅西班牙防水防污噴霧。
咪以為Lydia經常出入派對，好似唔憂做，其實佢落足心機搞呢盤網上生意，運作甫滿九個月已收支平衡。佢立志將網站搞成百貨公司，明知飲食類產品最受歡迎，但都唔肯捨難取易，繼續頻撲蒐羅靚嘢，挑戰難度嘅精神值得一讚。
唐貝詩（右）帶埋好多殘舊手袋及銀包，搵潘穎安（左）急救。