政壇：搞搞政：白鴿黨主席位無人吼

白鴿黨十二月召開黨員大會選新主席，接替因立法會選舉失利而引咎辭職嘅何俊仁。按常理應由兩名副主席單仲偕或劉慧卿頂上，但大家都覺得前者個性軟弱，難以喺逆境中帶領個黨由低位反彈，而後者早已公開表明唔會出選主席。所以主流派早前就吹風話應由「乳鴿」、立會新丁黃碧雲接任主席，但據聞黨內有唔少人認為佢經驗唔夠，又擔心佢講嘢過激容易闖禍。

乳鴿唔夠班，於是又有人反建議由非主流派嘅涂謹申或近年新入黨嘅尹兆堅接棒，而最近更有聲音推舉已退居幕後嘅張文光做主席，但張文話白鴿黨大敗係一個千載難逢嘅契機，可以換人上位，而佢心目中已有「換人時間表」，就係一六年黨高層要畀晒新人上位，二○年立會就全面換班，所以佢只會退居幕後培訓年輕一輩，仲話「太多眷戀、太多遲疑係唔得嘅」。

老鴿唔肯接呢個爛攤子，乳鴿又未夠班、撐唔起，總之就係冇人領導。究竟白鴿黨可否翻身，真係好難講。