政壇：錢果豐邱誠武埋身對決
港鐵競步賽尋日喺中環遮打道舉行，一眾城中名人當然趁機參加「港鐵主席邀請賽」，大展身手。賽事中尤以運輸及房屋局副局長邱誠武同港鐵主席錢果豐鬥得最激烈，佢哋喺賽道時可謂「叮噹馬頭」，到最後臨衝線前一百米，兩個人仲身貼身，你一步我一步，鬥快衝終點。
邱誠武臨衝線時，身體仲大幅度咁左扭右扭，手都舉起埋，希望身體擺動幅度大啲會行得快啲，但可惜最終都係以一步之微，輸咗畀錢果豐。不過佢哋都唔係爭緊冠軍，因為冠軍輪唔到佢哋喇。
落場競步嘅仲有行政會議成員張震遠、立法會議員謝偉俊同馮檢基等，之不過啲高官同議員嘅運動細胞就差啲，行得好慢，過終點時全部都喺中後位置。
錢果豐（前左）以一步之微險勝邱誠武（前右）。