政壇：社民連工黨合體成疑

政黨合併、分裂後再合併，可以話係政界家常便飯，同樣都係打基層、勞工議題嘅社民連同工黨，早排傳佢哋有機會醞釀合併，但經過幾個禮拜後，似乎未能發酵成功。有社民連中人透露，原來早排班兄弟喺啲非正式會議上都傾過呢個問題，大部分人都覺得工黨同社民連嘅路線相同，合作冇問題，但合併就有難度，始終擔心工黨未能「接納」社民連嘅激進作風喎！　　

據聞自從立法會選舉後，一班社民連中人經常坐低傾吓前路，佢哋都認為社民連繼續咁落去，只會「四五行動化」，變成一個壓力團體，所以同工黨合併都係出路之一，但聽講有人喺黨內提出後，「阿牛」曾健成即時舉手反對，講明如果同工黨合併，佢第一個會拉隊走人。原來阿牛覺得現時喺社民連自由自在，一旦同其他政黨合併，好多地方都要妥協。就係阿牛呢一句，冇人敢再提合併一事。

上街Vs講數

有社民連中人分析，社民連向來「行動先決」，無論係大小事都會上街抗爭，唔會評估議題係咪受大眾歡迎，但工黨未必同意呢種手法，寧願主張用議會力量同政府「講數」，所以大家目標一致，但做事手法大有不同，要合併真係難度好高。

講就係咁講，但唔代表兩黨合併完全冇機會，好似前晚社民連搞黨慶兼籌款晚會，工黨副主席張超雄就係唯一一位坐喺主家席嘅其他政黨人士，仲有份上台致詞，睇嚟兩黨合作會陸續有嚟。雖然家陣結唔成婚，但兩黨咪拍住拖先囉，可能遲啲拍拍吓會有feel呢。