大鑼大鼓查美容 衞署做騷得啖笑

美容淪為白老鼠，扮靚不成反送命。DR醫學美容集團發生嘅毒血針奪命事件，除咗暴露美容行業良莠不齊，亂象叢生，亦顯示政府監管失職，漏洞百出。當局事後亡羊補牢，又話要加強巡查，又話要修例堵塞，係威係勢咁，點知到頭嚟又係得個講字。

食物及衞生局局長高永文日前聲稱，將會設立小組優先研究規管醫學美容，盡快界定高危醫療程序，至於立法就要等兩至三年。佢仲話，當局會爭取半年內先推出指引，期間衞生署會監督美容廣告同加強巡查喎。

叮！乜嘢法例咁巴閉，居然要等兩至三年？急驚風遇着慢郎中，依家成個美容行業無王管，消費者利益毫無保障，當局慢條斯理，等立法完成咯喎，都唔知又會發生乜嘢事。試諗吓，喺呢段法例空窗期，如果再搞出人命，邊個孭鑊先？

至於講到加強巡查，更加得啖笑。衞生署聲稱喺毒血針事件後共檢閱咗超過二百個相關廣告，而巡查過嘅機構只得七間，而且全部冇發現違規喎。

嗱，呢啲咪叫自欺欺人囉，衞生署大鑼大鼓上門巡查，驚死冇人知佢哋係官員，你話係咪搞笑吖。正如有立法會議員質疑，署方冇採用「放蛇」手法，而係大模廝樣，表明身份上門巡查，可以查到問題至奇喇。例如巡查藥房有冇賣違禁藥，都要放蛇喇，如果話畀人知你係衞生署官員至查，有咩用？又例如打擊醉酒駕駛，如果事先張揚，話畀全世界知幾時喺邊度截查車輛，你話違規司機仲會唔會自投羅網吖？唔怪得有人話港產官僚「政蠢材」，真係一啲都冇講錯。

唔係冤枉衞生署o架。呢，近年醫療美容成行成市，廣告鋪天蓋地，五花八門，但衞生署成功檢控涉及美容服務嘅不良廣告個案，前年僅十一宗，舊年更少到只有兩宗，今年頭八個月亦只得兩宗咁大把。究竟係違規個案少咗，定係衞生署監管不力，畫公仔唔使畫出腸嘞啩。一句講晒，等呢班港產官僚為消費者把關喎，蚊都瞓蛇都死喇。

計太一叮話齋，人命大過天，可一不可再，醫療美容搞出人命，一次都嫌多，絕對唔容許悲劇重演。巡查又好，立法又好，唔該衞生署班官僚着緊啲認真啲，如果唔係，遲早畀人捉晒去做白老鼠，嘗試毒血針嘅滋味，叮！