SUN奇古怪：Sun潮語：【脫北者】

最近路過書報攤，發現一本薄裝港產漫畫，係由鄭建和先生主編嘅《脫北者》。一向都無追睇港產漫畫嘅習慣，但就被個書名吸引囉，到底咩叫「脫北者」？所以即刻研究吓。脫衣者脫牙者我可以理解，但「脫北者」就真係恕我孤陋寡聞，會唔會係潮語嘅一種？即刻買咗一本番屋企睇睇。

漫畫故事係講述主角千辛萬苦，要逃離一個北方專制極權嘅國度，投奔自由地方期間所經歷嘅殘酷同悲慘遭遇。「脫北者」本身屬於外來語，但依家都開始為一間本地報章所使用。

「脫北者」本身原來係韓國詞彙，係指某某設法要逃離北韓，投奔自由嘅人。脫係脫走意思，脫走本身?

日文漢字都有出現，「脫北者」就係脫走離開北韓咁解。

「脫北者」當然有大條道理脫北，北韓呢個國家係地球上碩果僅存嘅封閉專制國度，喺一街都係互聯網同成天衞星嘅時代，竟然仲可以搞個人崇拜，奉行極端極權金家天下獨裁制度。連年饑荒人民餓死，但國家依然可以發射衞星火箭，領導人金正恩仲肚滿腸肥，簡直匪夷所思。所以，一直有北韓人冒生命危險，做「脫北者」偷渡去南韓或者中國及俄羅斯等地。雖然有啲北韓人成功脫北，但下場都未必係好，有時仲好悲慘。因為長期响極端社會主義國家生活，同文明社會脫節，好多「脫北者」唔能夠融入正常文明社會生活。命都唔要投奔自由，點知係由一個地獄，去到另一個地獄。

今日好多人因為唔清楚「脫北者」嘅由來，見到個北字，就去形容脫離北方嘅人。包括脫離中國大陸，都當佢係「脫北者」，甚至最近網上都有文章，提及香港到底可否「脫北」，減少對中國大陸依賴。照咁睇，前港澳辦官員陳佐洱要大家提防港獨分子呢個憂慮，都未嘗無根據。