政壇：貪曾懶理舊伙記死活

鐵衙門、流水官，官員經常有調動，何況「貪曾」曾蔭權已經離任，過去跟開佢嘅一班近身亦雞飛狗走，各有去處。巧合嘅係，呢班昔日重臣都陸續調離被視為權力核心嘅特首辦，甚至同添馬艦門常開講再見，目前就只剩下前特首辦特別助理陳岳鵬，因為佢過檔政制及內地事務局做政治助理，先可以繼續留喺添馬艦返工。

原任「大內總管」嘅前特首辦主任梁卓偉返回港大教書同做研究，負責批准貪曾入住超豪總統套房嘅前特首私人秘書甯漢豪，早前就被調職出任地政總署署長。

另外已調離門常開嘅仲有前特首辦常任秘書長麥靖宇及前特首辦助理處長（傳媒）何小萍兩人，前者則調任工貿署署長，後者則出任油尖旺民政事務專員。貪曾最近除咗跟富豪上浙江考察外，重陽節翌日就約埋一班「曾朋友」食飯，唔知佢四出遊玩嘅同時，有冇一刻想起班舊伙記嘅死活呢？