政壇：張文嘆鴿仔立會提問渣
立法會已經開咗半個月會，一眾新丁開始交功課，建仔方面，蔣麗芸喺議員質詢、辯論嘅表現惹嚟唔少關注，至於因病棄選教育界嘅教協會長馮偉華尋日出席一個活動，問到對立法會新人表現嘅睇法，佢就開晒名暗踩蔣麗芸講嘢得把聲冇內涵：「蔣麗芸勇啲，好大聲講嘢，不過唔係做騷喎。」
民主黨張文光（張文）任立法會議員時可以話係金句王，同佢講起黨友黃碧雲喺議會內嘅表現，佢就好似「黨鞭」上身咁，話黃碧雲同接替佢做教育界功能界別議員嘅葉建源，雖然手氣好抽到提質詢同動議辯論，但就「捉到鹿都唔識脫角」，錯過對官員進行反擊嘅機會喎。
喺立法會打滾多年嘅張文仲話，佢哋兩個已經好過自己好多，事關佢第一次開會時直情驚到心跳加速，仲連點投票都要人教添。