政壇：衞奕信行山唔揀「私家路」
前港督衞奕信（David Wilson）現身香港，尋日朝早十一點鐘，佢同太太Natasha Helen Mary去咗淺水灣道一帶行山，隨行仲有幾位保安人員，雖已年過七旬，但佢行起山嚟依然係健步如飛，行咗半個鐘一啲都冇喘氣，仲可以氣定神閒咁叉腰擺甫士影相，真係犀利。
衞奕信尋日朝着住件紅色polo恤、黑色運動褲去行山，一向係行山遠足愛好者嘅佢，今次冇揀以佢姓名命名嘅衞奕信徑行，而係沿連接衞奕信徑嘅紫羅蘭山徑行去淺水灣坳，沿途遠眺港島南區風景，曾經貴為港督嘅佢好親民，話今次返香港純粹係當旅行、周圍行吓。咁佢到底返咗香港幾多日呀？衞奕信用普通話乾脆利落咁回答：「五天」，果然係中國通！
衞奕信一啲架子都冇，仲擺甫士畀記者影相。