政壇：林煥光為張建宗打氣

新一屆政府上場之後最矚目嘅惠民計劃─長者生活津貼喺立法會遭遇首敗，政府上下都好緊張，繼續開行火力游說議員，連日來喺立法會同議員頻頻過招嘅勞工及福利局局長張建宗尋日同行會召集人林煥光出席一個活動時，就借天氣單打政壇局勢，張建宗感慨自己喺立法會只能「望天打卦」，林煥光就鼓勵佢撐落去，咪怕議會內壓頂嘅「黑暗勢力」喎，林煥光口中嘅黑暗勢力原來係反對長津（前簡稱老津）嘅尊貴議員！

盼勿輕言放棄

多個社福傷健團體尋日合辦「盲人觀星傷健營2012」活動，除張建宗外，林煥光都以平等機會委員會主席身份出席。張建宗一到場，即刻被一眾團體代表包圍簇擁，大家你一言、我一語鼓勵佢堅持原則，努力爭取立法會通過長津撥款，喺立法會打仗打到一肚氣嘅張建宗深受感動，笑笑口話：「政府一定會盡力做，亦只可盡力做。」

到佢致辭時，張建宗就借活動營地單打：「呢度山明水秀，同立法會好唔同，我喺立法會只可以望天打卦！」林煥光致辭時亦和應張建宗，以「黑暗勢力」形容反對長津的議員，佢希望張建宗不要放棄：「我過去幾年為弱勢社群爭取權益，見到張建宗同勞工及福利局推動咗唔少新政！張局長，唔好怕咗啲黑暗勢力呀，撐落去呀！」

佢哋一先一後大講政府為長津計劃努力、再努力，贏得台下嘉賓及參加者一陣陣熱烈掌聲。不過，議會攻防畢竟唔係講吓就掂，張建宗雖然話望天打卦，但政府要想禮拜二再闖立法會，真係要花多好多心力至得。