文學諾獎已到手 大國文明何時有

以前提起諾貝爾，唔少內地同胞第一時間聯想到嘅可能係曾爆發核災難嘅前蘇聯切爾諾貝爾核電廠，而唔係諾貝爾獎。無他嘅，中國係諾貝爾獎稀客，如果唔係前年搞出劉曉波獲頒和平獎風波，中國人同諾貝爾獎就更難扯上關係。

好嘞，今次終於吐氣揚眉，莫言成為最新諾貝爾文學獎得主！嗱嗱嗱，計起上嚟，莫言唔止係第一位中國籍嘅文學獎得主，而且仲係第一位獲得內地官方認可甚至吹捧嘅中國籍諾貝爾獎得主添，今次應該唔會再出現頒獎禮上只剩一張空櫈嘅驚世場面嘞啩，中國人終於可以昂然踏上諾貝爾頒獎台！

咁講啦，中國人等咗超過一百年嘅文學桂冠，終於由莫言摘下，對華人嚟講，確係一件值得高興同自豪嘅事情。呢，莫言獲獎消息一出，舉國亢奮，議論紛紛，尤其係佢嘅家鄉更加大事慶祝添。不過咁，亦有人翻佢「紅色作家」嘅舊帳，話佢親政府，獎項所頒非人喎。其實計太一叮話齋，文學歸文學，政治歸政治，莫言嘅文學成就獲得認同，值得獲獎，咁就夠喇，毋須加上太多政治色彩，更加唔應該上綱上線。　

話時話，今次莫言獲獎，好多中國人真係心情複雜o架。事關對中國嚟講，呢個諾貝爾獎既係鼓勵，又係警惕，依家文學獎攞到嘞，物理獎、化學獎、醫學獎、經濟學獎等幾時至有零的突破呀？科技實力代表國力興衰，中國喺頒獎舞台長期缺席，又點配講大國崛起呀？

冇錯，正如有人話齋，中國偽劣產品氾濫成災，黑心食品層出不窮，證明唔少中國人係科技人才化學天才，絕對夠資格攞諾貝爾獎喇，叮！

唉，莫言嘅作品經常反映弱勢群體嘅生活困苦，其實，現實當中嘅中國社會亦不遑多讓，老百姓被遷拆、被欺壓、被遺棄嘅多不勝數，而法治殘缺之下人民被失蹤、被自殺、被神經病嘅更加不勝枚舉。

文學諾獎已到手，大國文明何時有？中國人唔止希望見到中國嘅文學作家能夠走出國門，更加希望見到中國嘅社會文明能夠同世界接軌，如果神州大地可以無晒貪官污吏，無晒黑心食品，無晒不公義現象，咁到時大家就真係好似莫言個名咁，開心到講唔到嘢嘞，叮！