SUN奇古怪:Sun潮語:【攬炒】

依家啲電視劇,創意欠奉,質素已不可同以往全民電視撈飯嘅黃金時代同日而語。依家套套劇無論古裝定時裝,啲對白都好似copy and paste咁,負責製作嘅人又青黃不接。搞到咁,難怪最近回歸電視圈客串拍劇嘅 Chilam 張智霖,都喺微博度呻,大鬧依家啲電視人唔專業,引發咗一場網上小罵戰。講開電視劇,以下對白你一定聽過:

「我得唔到,我都唔會畀你得到!」「想我死?咁我哋攬住一齊死!」「我死咗,你哋全部同我陪葬!」呢種損人不利己嘅做法,就係潮語所謂嘅「攬炒」!

「攬炒」就係與別人玉石俱焚兩敗俱傷嘅意思,即係自己出事,都要搵人攬住一鑊熟!

「攬炒」有分主動同被動。主動「攬炒」係你衰咗,攬埋人哋一齊炒。被動,當然就係「被攬炒」。無端端被人拉落水,有時明明唔關你事,都被人攬埋一齊衰。「攬炒」有時亦會係兩廂情願,即係有啲嘢發展落去只有互相毀滅,但係依然不理後果,死都攬埋一齊死,呢啲到底係戇居定淒美?真係你諗你。但其實「攬炒」呢個潮語係源自啤牌遊戲「鋤大弟」!四個人每人十三隻牌輪住出,最快出晒所有牌勝出,而有其他玩家手上仲有多於一定數目嘅牌未出,就要被罰雙倍或甚至三倍嘅牌數。呢個罰則就叫「炒雙」或者「炒三」。鋤大弟最後埋單計數,係以隻數差額計算,所以當某一局玩緊嘅時候,如果知道自己會被炒,通常會運用啲技術,搵人陪「炒」,咁計隻數差額就唔使輸咁多,呢種自私行為就叫做「攬炒」。

第一手消息請下載on.cc東方互動iPhone/iPad/Android/Windows Phone Apps

廣告人、網台主持 阿東