政壇：搞搞政：陳健波買樓眼光獨到

樓市陷熱潮，各方都密切關注樓市走勢，自動當選為新一屆立法會保險界議員嘅陳健波（KP）都係樓市資深投資者，講到近期樓市，佢就認為豪宅樓價點都會企硬，但一啲新界偏遠地區嘅天價新樓就要小心嘞。投資有道嘅陳健波，早喺低位一口氣掃咗兩個海怡半島單位，既收租又食正樓價上升條水，果然好眼光。

陳健波鍾情投資豪宅，年前佢先後買入多個貝沙灣單位，依家升值隨時超過一倍。早前政府推出額外印花稅打擊豪宅炒風，令豪宅售價一度回落，佢就睇準時機掃入兩個海怡單位，經豪裝後以好價租出。佢透露有關單位樓價現已升唔少，加埋幾年後港鐵港島南線通車，肯定會再升，佢打算揸多幾年先放售，到時仲唔受額外印花稅影響添。

家吓樓價屢創新高，佢就話要小心息口上升，仲估計新界偏遠地區嘅天價新樓可能一加息就跌價，而依家嘅低息環境無可能永遠持續，美國總統選舉就係一大變數，白宮一旦易主，美國財政政策亦可能生變。