政壇：「阿里爸爸」新look少煩惱
阿里巴巴「掌舵人」馬雲創意十足，近排佢嘅創意忽然上咗頭上，網上近日瘋傳佢同一班員工嘅合照，可以見到呢個「阿里爸爸」變咗光頭爸爸，佢嘅新look引嚟好多人討論，有人估佢係咪因為事業、感情受挫，甚至估佢身體出現咗問題。更有人言之鑿鑿話，馬雲因為同中國「創業達人」史玉柱，就「京東、蘇寧價格大戰」結局打賭，依家輸咗，咪兌現君子協定剃光頭囉！
呢個傳言雖然夠娛樂性，但據八卦結果顯示，馬雲「新look」完全無任何打賭成分，只係佢個人決定想轉吓新髮型！而光頭馬雲亦令佢嘅同事眼前一亮。
網民對於馬雲「新look」讚不絕口，覺得好青澀。佢喺事業上經過咁多年風風雨雨，依家阿里集團喺雅虎手上回購股份嘅計劃又搞得如火如荼，馬雲捨三千煩惱絲，睇怕煩惱更少啩。
馬雲（紅圈示）與員工的最新合照顯示佢剷咗個光頭，精神奕奕又後生咗。