政壇：張宇人郁手剪布

新一屆立法會勢力重組，建制派包攬咗立法會大會、內務委員會、財務委員會三大要職嘅主席位，建制派位都未坐定，已經有意郁手剪布，首招就係圖借財委會新任主席張宇人之手，落實避免有人藉多項動議拉布嘅困境，呢一記「返嚟就郁」嘅絕招就係限定議員只可提一項動議嘅方案，睇嚟啱啱做財委會主席嘅張宇人要頭痕囉。

暑假前嘅政府架構重組方案演變成「拉布」大戰，結果一石激起千重浪，一眾泛民議員為咗唔畀方案通過，鑽盡議事規則嘅空子提出多項動議，仲一度將「拉布」戰線拉前至財委會同人事編制委員會。當時就有議員去信財委會主席，話議事規則中議員可以「動議一項議案」，應該被理解成只能提出一項動議。不過當時嘅財委會主席、白鴿黨嘅劉慧卿就對呢個「另類解讀」無動於衷。

重提「另類解讀」

事隔三個月，新一屆立法會嘅轉莊遊戲落幕，桃花依舊、人面大不同嘅立法會，建制、泛民勢力亦大變，財委會嘅當家變咗建制派嘅富貴黨張宇人，尋日更有建仔嘅議員急不及待去信張宇人，再次提出呢個「另類解讀」，仲建議張宇人將呢個「另類解讀」擴大至人事編制委員會同工務小組委員會。呢個波已經掟咗畀張宇人，佢如果「有所共鳴」，以後議員嘅發言就會被大大限制，但佢亦會成為復會後泛民同建制派第一場激戰嘅磨心。

剪布之外，建制派亦強勢到攬住多個事務委員會嘅主席位，不過，司法及法律事務委員會就出現激烈競爭，建制派支持經民聯嘅梁美芬，泛民就支持公民黨郭榮鏗（Dennis），到尋日為止，建制同泛民加入上述委員會都各有十一人，議員加入各事務委員會嘅限期係今日中午截止，呢個委員會隨時會有超過三十人加入。