東方一呼善長應 捐肝救人顯愛心

有人話，香港地世態炎涼，人情冷漠。其實，只要大家多啲關心身邊嘅人和事，就會發現香港人愛心爆棚，亦會發現世界原來如此美麗！

嗱，又有好人好事喇，東方報業集團再次譜寫出一個感人肺腑嘅愛心故事。三十二歲單親媽媽陳旭娟係廿四孝母親，一直同三歲大女兒過住平凡嘅日子，可惜好景不常，上個月誕下幼女之後，因為日以繼夜照顧BB，懷孕時又工作過度操勞，抵抗力轉差，結果引發肝臟急性衰竭，一度陷入昏迷，命懸一線。

身為兩名幼女嘅母親，面臨陰陽永隔，人世間嘅哀痛莫過於此；而陳母擔心失去愛女，更加肝腸寸斷，哭成淚人。你知啦，器官捐贈喺香港仲未普及，等候肝臟移植隨時仲耐過等公屋上樓，阿娟徘徊生死邊緣，親友愛莫能助，只能盼望奇迹出現。

果然，皇天不負有心人，奇迹真係出現喇。東方報業集團發揚為民喉舌嘅宗旨，詳盡報道阿娟亟待換肝嘅消息，隨即牽動港人嘅愛心，一日之內就有過百位讀者表示願意捐肝救人。有初為人母嘅讀者深深同情阿娟嘅遭遇，不忍見兩名稚女失去母親；亦有單親母親欲伸出援手，甚至有身在澳門嘅讀者表明願意來港驗身捐肝。

天無絕人之路，一名啱啱辭世病人捐出肝臟，加上阿娟無限嘅求生意志，終於成功完成八小時手術，獲得新生，恭喜晒！

一家三代母女情，終於唔使分離，陳家重現笑容之餘，亦不忘感謝肝臟捐贈者同東方報業集團嘅熱心幫忙。

講到呢度，太一叮不得不讚吓各位善心讀者，你哋嘅愛心好似太陽一樣，唔止為阿娟帶來生機，為陳家送上溫暖，更加令香港暖流處處，溫情洋溢。所以話，有正義傳媒，有善心嘅香港人，人間就會有希望，世界就會更美麗！

病魔無情，人間有愛，東方報業集團登高一呼，應者雲集，除咗反映正義傳媒影響力巨大，亦反映香港人愛心爆棚。無錯啦，救人一命勝造七級浮屠，捐贈器官可以救人，功德無量，希望讀者將愛心延續落去，譜寫出更多更美嘅故事！