政壇：吳錦青日本賣錶起家
日前喺銅鑼灣遇見博愛醫院總理吳錦青同太太黃海燕，原來佢哋間錶行就喺附近。講起佢當年入行做鐘錶生意，原來都幾傳奇。話說佢年輕時曾做導遊，有次帶團遊日本，經過一間專賣日本錶嘅店舖，老闆被佢戴住新簇簇名錶吸引，游說佢放低試賣，測試吓日本人對舶來品嘅反應。
佢話當年用成個月人工買隻靚錶獎勵自己，啱啱戴咗三日，幾經掙扎，決定開雙倍價錢留低隻錶，估唔到冇耐老闆就通知佢隻錶已成功賣出。佢茅塞頓開：「原來有錢人嘅錢咁易賺！」於是開始做鐘錶出口到日本嘅生意，掘得人生第一桶金。日後無論做乜生意，佢都奉行「要做有錢人生意」嘅最高原則。依家除咗投資地產、名畫之外，又計劃做翡翠玉石生意，總之唔貴唔做。
吳錦青（左）同太太（右）靠錶行起家。中為吳太細佬、錶行董事總經理黃海波。