悲情城市童黨多 黑幫入侵嘆奈何

暑假係學生最開心嘅時候，唔使返學之餘，仲有陽光、海灘、歡笑等等。不過咁，對於居住於悲情城市嘅學生嚟講，暑假可能亦係最危險嘅時候，點解？事關呢段時間正係黑社會招攬新兵嘅最好時機，而且招攬對象唔止中學生，連「小學雞」都唔放過，問你怕未！

青少年思想單純，易呃易氹，自然而然成為黑幫主要吸納對象，尤其係悲情城市天水圍、元朗同屯門，黑幫活動最猖獗，童黨問題最嚴重。呢，本報記者前往上述三區巡查發現，屋邨公園、便利店、的士站或空地，經常可以見到三五成群嘅童黨聚集，三更半夜都唔願回家，跟住「大佬」飲飲食食，蝦蝦霸霸；有人仲喺便利店盜竊斷正，搞到被拉上差館添。

知情人士爆料，黑幫中人經常擺出「大佬格」，動不動就「吹雞晒馬」，小學生覺得大佬夠威又有型，基本上唔使威逼利誘，已經自願入會。除此之外，黑幫又會透過所謂聯誼活動招兵買馬，小學生呼朋引類參加，令黑幫好似雪球咁愈滾愈大。

可能你會問，小學生唔睇得又唔打得，點解黑幫要踢佢哋入會呀？原來黑幫好有遠見，貪小學生升值潛力高吖嘛。正如過來人話齋，小學生依家唔打得啫，但會大o架嘛，等佢哋升咗值之後，帶粉又得，做替死鬼又得，得咗！

可能你又會問，點解黑幫咁鍾意向天水圍呢啲地區埋手呀？答案其實好簡單，天水圍位置偏遠，基層家庭多，加上地區資源匱乏，文娛設施不足，青少年無所事事咯喎，自然易入歧途啦。有地區人士擔心，區內青少年被黑社會滋擾嘅個案近年急增，情況可能愈來愈惡劣。話時話，呢啲擔心唔係杞人憂天o架。

講到尾，天水圍之所以淪為悲情城市，成為黑幫招攬新兵嘅熱點，皆因港府規劃失當。近年天水圍經常發生倫常慘劇，當局話就話要增加資源，加強支援，點知到頭來又係大隻講。有社工指出，天水圍地區支援不足，又缺乏就業機會，家長為口奔馳，好多時要跨區搵食，根本冇時間照顧子女；而當局又唔肯投放更多資源開設輔導機構，即使地區人士知道黑社會問題嚴重，亦因人手不足而束手無策。

正如梁啟超話齋，少年智則國智，少年強則國強。青少年係未來嘅希望，如果新一代紛紛淪陷，未大先黑，咁香港仲有乜嘢希望呢？唔該港府快快正視問題，救救孩子，叮！