SUN熱辣：黑幫趁暑假吸小學雞

【專案組】踏入暑假，正是黑幫招攬新兵好時機！「有冇跟大佬？冇就跟我哋！」深夜時分，天水圍、元朗及屯門已淪為黑幫徵兵場，不時見有疑似黑幫人士向在街道流連的青年「盤問」，對象不論是中學生或小學生，都一「攬」無遺。多名青年踢爆近年黑幫收o靚，主要以小學生為目標人物，貪其易氹，「升值」潛力高；又會透過大搞聯誼活動，如燒烤及唱K等活動，在「Friend搭Friend」介紹下，滾雪球般愈滾愈大。

招攬新血之一

「黑幫走入天水圍、屯門、元朗收o靚，貪嗰度多細路，又易氹。」自稱已加入黑社會的青年表示，暑假期間，不少學生無所事事，部分更是自願加入黑社會，成為生力軍。其中於天水圍天瑞邨、天耀邨便利店、元朗西菁街兒童遊樂場及屯門華都商場等，經常有少男少女集結，成為黑幫收o靚的高危地。

「佢哋（黑幫）會去公園搵吓啲Kai仔，講聲：『喂！跟我呀！』就係咁就入咗黑社會。」經常在天水圍流連的健仔表示，黑幫會擺出「大佬格」，令小學生產生仰慕而自願入會，基本上不需利誘和威嚇，而小學生之所以受歡迎，因其「升值」潛力高。健仔進一步表示，黑幫中人會「養」小學生帶毒品：「佢哋依家唔打得，但係會大o架嘛，等佢哋升值，大咗就可以去劈友同帶毒品、做替死鬼。」

「Friend搭Friend」介紹

「除咗仔，咁女收唔收？」「梗係收啦！」另一名疑是黑幫成員的阿山高聲回應記者提問，指少女主要是陪伴角色，年紀一定要年輕，「陪玩，陪hea，傾吓偈咁，同埋啲男仔見有女陪，都覺得好呀！」

當他們入會後，黑幫中人又會大搞聯誼活動，發揮新成員「Friend搭Friend」的力量，將幫會陣容如滾雪球般愈滾愈大。據了解，近日正值暑假，聯誼活動十分頻密，包括燒烤及唱K等年輕人時興活動，成功吸納不少無所事事的中、小學生，成為新血。

除免費聯誼活動，加入黑社會後的「霸氣」，也令不少人慕名入會。身上刻有多條龍紋身的阿山坦言，加入黑幫後，經常「Call人晒馬」，好不威風：「試過有次，大佬話吹雞，有人入嚟天水圍搞事，我幫手Call啲人去廣場聚集，當時應該過百人！」阿山表示，因為威風，不少小學生會主動要求入會：「多數Friend搭Friend，啲細路見朋友跟大佬又威又有着數，就會搭人，或親自打畀大佬，講聲『我跟你』！」

元朗黑社會滋擾增一倍

另外，黑幫亦會使用傳統方法，以威嚇及武力踢人入會。不時在元朗西菁街兒童遊樂場流連的歐同學和伍同學直言，曾遇過有人想踢他們入會，對方初以恐嚇言語威逼，他們不從，最後演變成武力解決；歐同學說：「我本來想報警，但都無用，最後打起上嚟，我哋最後都冇就範！」

元朗區議員李月民表示，自從暑假開始，青少年投訴被黑社會滋擾的個案急增一倍。屯門區議員嚴天生亦稱，屯門區也愈來愈「雜」：「好多疑似黑社會後生仔，態度惡劣咁拉人買書、整指甲，曾向警方反映呢區嘅青少年問題，希望警方加強巡邏！」