SUN世代：父傳授識食之道
闖入飲食界已有十四年的程少儀，回想當年初加入公司時，經常被爸爸質疑是否「識食」，「爸爸有話過我食都唔識食，仲成日考我，叫我講出菜式點樣好食。」常被難倒的她，坦言「食」是一門好高深的學問，易學難精，要做食神更難：「菜式好唔好味，要靠好多嘢配合，例如食材等因素。我鍾意食，識食，但唔係食神。」
喜歡飲飲食食，經常與朋友四圍搵食，除可以吸取不同食肆的經營經驗外，又可以趁機偷師，激發她鑽研新菜式的動力：「我同朋友出去食飯，好鍾意問嘢，啲朋友成日都唔畀我點菜，因為我見到菜單有啲咩特別嘢時，就會不停問，朋友都驚咗我！」
程少儀表示，爸爸程基（左）對她的影響甚深。
孻女孻心肝，程少儀（左）是父母心肝椗。（受訪者提供）