政壇：KK選超級議席唔老利

話說由九龍西直選轉戰超級議席嘅民協KK馮檢基，原本打算尋日去報名，據聞仲有一班公公婆婆會到場幫佢打氣。點知因颱風韋森特殺到，雖然朝早十點零鐘已改掛三號波，但佢都係擔心班公公婆婆橫風橫雨出門會唔安全。就因為颱風吹散晒啲支持者，佢惟有死死地氣改期到星期五報名，真係出師不利。

司馬文或加入戰團

睇番今次KK轉戰超級議席，政圈中人一直唔多睇好，剩係當初泛民主派協調超級議席參選名單冇預到佢，最終佢幾經困難先搵多個外援提名湊夠數入場，仲要向泛民擘大喉嚨話要參選，兼夾「又傾又砌」先博到個名份，加上尋日遇啱打風報名不成，參選真係一波三折。

其實今次KK轉戰超級議席，可以話係兵行險着。建制派對手有建仔李慧琼同劉江華、工聯會陳婉嫻唔在講、白鴿黨嘅何俊仁同涂謹申，之前仲要殺出個「白姐姐」白韻琹，KK都咪話唔驚。莫非個天都想提醒KK停一停，諗一諗，係咪要繼續報名選超級議席呢？但KK嘅黨友譚國橋已報名參選九龍西，意味KK已冇得返轉頭，整定要背水一戰。

同KK一樣咁多波折嘅公文袋南區區議員司馬文，一直想選超級議席，雖然佢終於取得中國國籍有資格參選，但黨魁袋巾傑話該黨參選隊伍都做好晒預算，如果司馬文參選超級議席，會有一定困難，所以至今仍未傾掂，但呢兩、三日就會有決定喎！如果司馬文參選，真係「多個香爐多隻鬼」，KK應該有得震冇得瞓喇！