「咪當我乞兒揼低唔理」

【本報訊】港鐵觀塘線昨日凌晨亦發生「翻版東鐵」事件，二百乘客在彩虹站被「老點」下車，部分人無家可歸，被迫在車站「宿一宵」。有乘客指列車到達月台前，並無廣播指列車不能行駛架空路段，要以彩虹站為總站，突然叫落車令市民措手不及，炮轟港鐵不負責任，並拒絕離站，有數十人被迫在站內以閘機為床、鋪垃圾袋席地而臥等天光，職員雖派水及餅乾安撫，但乘客不領情，怒罵「咪當我哋係乞兒，揼低咗我哋係度就唔理」。

昨日凌晨約一時，天文台發出十號風球，一列從油麻地開往調景嶺的觀塘線列車，駛至彩虹站後突然停駛，車長透過廣播呼籲乘客全部落車，近二百名乘客以為港鐵另有安排，但落車後始知彩虹為尾站，乘客需要自行搭車，港鐵不會有接駁巴士。有逾百乘客群起鼓譟指摘港鐵安排失當，在月台及大堂拒絕離開。

難抵疲勞瞓閘機

有人難抵疲勞，向職員取來垃圾膠袋鋪地而睡，有人更以閘機為床在上面大覺瞓。港鐵職員見乘客不肯離去，只好妥協，向滯留的人派水派餅解渴充飢兼避風。乘客鄭先生稱，港鐵改彩虹為尾站前從未有公布，批評港鐵當乘客「係乞兒」。姓藍乘客擔心不能回家，怒指「自己上錯賊車，依家都唔知點算」。另一乘客廖先生則指，「港鐵乜都冇安排，淨係畀飲品我哋，又冇賠償，冇理由咁就算」。港鐵發言人解釋，九號風球發出後，基於安全考慮，部分地面及架空路段陸續停駛。

另外，西鐵和輕鐵亦先後發生故障。昨晨七時許，屯門輕鐵新墟站旁的一棵大樹，被強風吹塌，壓向月台的上蓋及電纜，介乎杯渡站至鳳地站暫時停駛。

港鐵派出工程人員到場搶修，至九時許列車服務回復正常，輕鐵天慈站昨晨亦有塌下大樹阻路軌，列車需改道行駛。昨午四時許，西鐵錦上路站突發生訊號故障，服務一度受阻。