扶貧整合關愛 勿再半途而廢

由特首梁振英一手重建嘅扶貧委員會籌備小組預告，會同關愛基金整合。啱o架，曾蔭權時代嘅扶貧委員會一事無成，搞到窮人超過百萬，點解呀？就係因為欠缺一份對窮人嘅關愛之心囉，扶貧只係為咗粉飾太平，做騷咁做，唔失敗有鬼咯。家陣扶貧有咗關愛，希望對窮人嚟講係一個好兆頭啦。

叮！講起就心噏，香港號稱富裕城市，窮人一街都係，公公婆婆執紙皮賺錢餬口已經成為極具香港特色嘅街頭一景。所以話，扶貧委員會嘅工作真係刻不容緩o架。嗱，籌備小組前日開完首次會議，即刻預告委員會最遲十月就會成立，下設執行委員會，由身為港府阿一嘅梁振英擔任主席。為咗更好運用資源，委員會會同關愛基金整合，未來兩個月諮詢公眾。

嗱嗱嗱，扶貧委員會重新起錨，全速開動，係好應該o架，事關貧苦大眾等官老爺伸出援手，已經等到頸都長。至於整合扶貧委員會同關愛基金咯喎，成效點樣唔敢講，但係根據負負得正理論，試一試又無妨喎。

無錯，以前嘅扶貧委員會負面形象深入民心，但係有乜實質工作幫助基層，就無乜人知。結果窮人愈扶愈多，愈扶愈貧，扶下扶下仲扶到反映貧富懸殊嘅堅尼系數達四十年新高，又扶下扶下扶到連扶貧委員會都執埋笠。講到呢度，貪曾治下嘅扶貧工作係乜情況，都唔使講落去啦，吓話？

扶貧半途而廢，關愛一樣有名無實。港府成立關愛基金，話就話幫綜援網外嘅漏網之魚，實際係幫施政無能嘅庸官劣吏。港府派錢六千蚊觸發天怒人怨咩？搵關愛基金補鑊。最低工資立法疏漏咩？又搵關愛基金補救。關愛基金結果淪為貪曾政府嘅「關人基金」，主要係用嚟卸膊嘅。

叮你個鎯鎯，扶貧委員會有名無實，關愛基金無關無愛，港府扶貧正一整色整水，窮人邊有可能出頭吖？港府窮得只剩下錢，而基層就窮到連買底褲嘅錢都無！

梁振英重設扶貧委員會，方向係絕對正確o架，但千祈咪學貪曾呀，扶貧有姿勢無實際，結果一定係搞到灰頭土臉o架。當然啦，更加唔好學以前嘅扶貧委員會大元帥唐英年，吊吊揈，無腰骨，無膊頭。

一句講晒，扶貧有了關愛，窮人才有希望。新扶貧委員會要做事，做實事，基層先至有出頭天，叮！