政壇：搞搞政：盛智文兩票在手 挺完張宇人撐葉劉

九月立法會選舉嘅戰鼓已經響起，自由黨張宇人（Tommy）就拉埋近百個飲食業界代表到添馬公園宣布競逐連任立法會飲食界議席，蘭桂坊之父盛智文係助選團團長之一。不過，兩票在手嘅扮嘢文有言在先，佢將會提名新民黨主席葉劉淑儀出戰港島區，言下之意係同樣喺港島出戰嘅自由黨劉健儀就幫唔到喇，佢仲聳聳肩話，係葉劉問佢攞提名先！

扮嘢文尋日為Tommy站台好落力，問佢點解要支持Tommy，佢就笑笑口話，因為選擇唔多喎，但之後又兜番其實Tommy係有做嘢嘅。

自由黨尋日都公布咗立法會參選名單，主席劉健儀將聯同邵家輝及李鎮強出選港島區，而榮譽主席田北俊就聯同「莎姐」周梁淑怡、梁志偉及廖國華出戰新界東直選。至於功能界別方面，除咗Tommy出選飲食界外，方剛亦會競逐連任批發及零售界，而航運交通界就由易志明出選，紡織及製衣界就由鍾國斌出戰。莎姐話，該黨唔可以輸，亦冇諗住輸，真係盡地一煲喎。