政壇：司馬文為參選歸化中國
公民黨（公文袋）南區區議員司馬文係荷蘭人，有意參選九月立法會區議會超級議席，但早前就被公民黨以仲未攞到中國護照為由拒絕。事件尋日有新發展，司馬文正式放棄荷蘭國籍，今朝會去入境事務處領取入籍中國籍嘅證明。但據聞公文袋依然唔放行，尋日一度傳出佢退黨參選嘅消息。
司馬文尋日傍晚同公文袋商討參選問題，據講雙方都有讓步，公文袋黨魁梁家傑夜晚被問到司馬文退黨事件，佢好有保留咁話：「畀啲時間操作吓啦，佢（司馬文）仲未攞到（中）國籍喎！」咁會唔會勸退司馬文呢？梁家傑就再話：「畀啲時間操作吓啦，呢幾日會有決定喇。」但佢就堅決話明唔會換名單。公文袋無派人選超級議席，但又唔畀司馬文出選，有傳聞話佢哋已讓路畀白鴿黨，唔知係咪事實呢﹖