政壇：工聯會禁議員兼人大政協
繼早前規定全部參選人退出民建聯，同競爭對手劃清界線後，工聯會內部再傳新招，據聞工聯會將規定新一屆立法會議員唔准兼任港區人大及政協職務，以示對立法會工作嘅重視同專注。
建制派人士一旦成功當選立法會議員，唔少都會獲中央延攬做港區人大代表或全國政協委員，但工聯會就希望議員專注立會工作。依家工聯會幾位立法會議員，有人大或者政協職務嘅暫時只得九龍東嘅黃國健，如果佢成功連任嘅話，嚟緊就唔參選下屆港區人大選舉喇。
有工聯會人士就話，呢個決定係唔想選民覺得參選人有「後路」，換言之工聯會今次係許勝不許敗，希望藉此爭取選民支持。