政壇:CY救新光汪阿姐like爆

粵劇係嶺南一族嘅文化瑰寶,完成保育計劃嘅油麻地戲院變身為粵劇中心,尋日舉行開幕禮,粵劇界一眾名人都有出席,包括身兼全國政協委員嘅汪明荃,問到新政府登場嘅表現,阿姐話,梁振英同佢嘅新班子啱啱先接手,市民應該畀啲時間佢哋做嘢。

阿姐對CY為粵劇界做嘅事一清二楚,話多得CY穿針引線,新光戲院先可以保留落嚟,佢認為CY對粵劇好熱心,亦好有誠意。粵劇界大老倌阮兆輝、羅家英尋日亦有出席呢個活動。

近日有消息話,原本代表體育、演藝、文化及出版界嘅霍震霆被人勸退,改為支持做電影出身嘅港區人大代表馬逢國接棒,業界甚至有傳九月會發動投白票添,亦有傳有人搵啱啱失落文化局局長寶座嘅前灣仔區議會主席黃英琦出戰呢個界別。

問到阿姐點睇?佢話同馬逢國都相識咗一段時間,亦算熟落,但就冇表態係咪支持。至於霍震霆任內表現,阿姐都好老實話:「佢比較專注體育方面!」霍震霆昨晚回應,即使唔做立法會議員都可以繼續服務市民。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

汪阿姐同粵劇前輩紅線女同撐粵劇中心開幕。

油麻地戲院係本港碩果僅存的戰前戲院。