政壇：劉健儀剝李華明「內褲」

第四屆立法會任期尋日告終，議員最後一日開會，加插唔少惜別嘅溫馨笑料，內務委員會主席劉健儀（Miriam）尋日特別夥同副主席李華明同記者總結四年嘅內會工作。談到所見所感，搞鬼嘅係劉健儀竟然揶揄李華明呢條「內褲」（內會副主席）應該換喇，實行「剝」肥仔明嘅內褲（副），肥仔明笑笑口、夾手夾腳製造笑料。跟住佢哋又品評呢四年接觸嘅三個政務司司長，原來唐英年最有官威、林瑞麟就識得以茶冧人。

品評三屆政務司

立法會內會係大會之下另一個重要嘅會議，內會主席係大會主席唔得閒時嘅當然替身，尋日做咗內會主席多年嘅 Miriam就總結吓四年工作。臨別在即，話咗唔再參選嘅肥仔明十月都冇得再返立法會，佢顯得依依不捨，用手搭住Miriam膊頭，十足情侶咁款。

一向嚴肅、穩重嘅Miriam唔知係咪近得鍾意搞笑嘅肥仔明多，竟然話：「無論點都好，條內褲（內副）就一定要換！」一邊講一邊望向肥仔明，內會副主席係「內褲」，真係笑到噴飯。難得肥仔明一啲都唔介意，仲好有默契咁接住話題：「梗係啦，條底褲着咗好耐、咁污糟！」

講笑之餘，肥仔明仲品評過去幾年合作過嘅三個政務司司長（CS）。根據過去每星期同CS會面嘅觀感，肥仔明覺得，唐英年呢個司長官威十足，好似乜都企喺政府立場出發；而林瑞麟呢個接任司長就係第一個請佢同Miriam飲茶嘅人；至於上任十幾日嘅新政府政務司司長林鄭月娥，肥仔明就記得，林鄭同佢哋喺CS辦公室內合照！

尋日會議之後，好多議員都表明唔再參選，勞聯李鳳英準備退休後為工會當義工，工聯會嘅王國興同佢惺惺相惜，特別寫咗幅大字《疾風知勁草》送畀英姐；白鴿黨嘅甘乃威都話佢未來「Ｎ屆也不會再選」，問到任內最難忘係咪被人查好感事件﹖佢話：「查人或者被人查都係立法會工作。」