政府山埋炸彈 跛腳鴨又靠害

雁過留聲，人過留名，曾蔭權禍港七年，留畀下屆政府嘅除咗一個爛攤子，仲有成堆政治炸彈，簡直係累人累物累街坊。無縫交接係假，有心靠害就真。

港府日前公布中區政府山西座重建方案，堅持拆卸後重建為商業用途，並且首次以「建造、營運、轉移」模式，邀請發展商參與。發展局局長林鄭月娥吹水話，呢次發展機會千載難逢，既可提升香港金融中心地位，又冇違背文物保護嘅原則喎。

不過，關注團體同部分政客就堅持政府山西座具有保育價值， 質疑當局一直同發展商打同通，指拆卸亦可能涉及其他政治考慮，仲話考慮申請司法覆核阻止添。一方企硬要拆，另一方堅決反對，各說各話，互不相讓，睇怕呢場保育大戰仲有排打，唔知最後究竟點收科。

咁啱得咁蹺，古物諮詢委員會同一日通過將政府山東座列為一級歷史建築，西座就改為二級歷史建築，更加令環保人士振振有詞，質疑拆卸有政治目的。

話時話吖，西座有冇保留價值，應唔應該拆，正一見仁見智，言人人殊，既冇絕對標準，更唔可能有全民共識。計太一叮話齋，保唔保留仲係其次，最緊要快快趣趣拆掂佢，唔好留低個炸彈畀下屆政府。其實，呢單嘢本來好小事，皆因煲呔曾政府縮骨無能，早唔拆遲唔拆，偏偏依家先至話拆，卒之愈搞愈大鑊，唔止搞到滿城風雨，仲演變成國際事件，連中央政府都無端端被拖落水，真係搞笑。

呢，本港關注團體爭取到國際古蹟遺址理事會、國際建築師聯會同國際現代運動建築遺址協會三個組織，就政府山西座發出全球「保育警示」，要求港府擱置拆卸計劃，完整保留，如果唔咁做，就顯示「中國違背保護文物承諾」喎。保育戰國際化，港府自己衰咗連累埋中央，認真好帶挈！

講開又講，依家正值新舊政府交接嘅關鍵時刻，任何敏感話題都可能演變成政治風暴。煲呔曾呢頭扮晒嘢，話要同下屆政府實現無縫交接，嗰頭又一手挑起政府山保育爭拗，擺明靠害嘅啫。

樹欲靜而風不止，從最近突然出現嘅各項爭議及亂象可見，煲呔曾所謂無縫交接，其實處處陷阱，新政府稍一不慎，隨時中招。太一叮都係嗰句，明槍易擋，小人難防，梁振英千祈打醒十二分精神吖，叮！