政壇：長毛送鐘寸貪曾時辰到
貪盡海陸空醜行曝光後，貪曾已成過街老鼠，尋日佢最後一次出席立法會午宴時，被議員由頭奚落到腳。一開始，社民連梁國雄（長毛）先「送鐘」（送終），主席曾鈺成亦送咗份杯墊畀佢留念，話將來飲咖啡時都可以諗起立法會喎，擺明暗寸貪曾畀廉政公署請飲咖啡調查，認真折墮。
長毛尋日好有心思，送咗個購自以色列耶路撒冷嘅「教皇鐘」，祝福貪曾夠鐘走人，小器嘅貪曾喺傳媒鏡頭下只好面露尷尬笑容收咗份「厚禮」，轉個頭塊面已經黑氣沖天。曾鈺成就代立法會送咗一份印有立法會圖案嘅杯墊畀貪曾，話希望貪曾第日飲茶、飲水同飲咖啡時都諗起立法會喎，貪曾最快飲嘅可能係廉署嗰杯咖啡喎！
梁國雄向貪曾送上一個「教皇鐘」，祝福貪曾夠鐘走人。