政壇：搞搞政：黃容根執口水尾博連任
立法會九月舉行新一屆選舉，漁農界代表黃容根自動當選咗十二年，業界有唔少要佢退位讓賢嘅聲音，黃容根尋日話，預計最少有兩人會喺九月選舉挑戰佢，一個係黨友何俊賢，另一個就係經濟動力成員陳美德。根哥呢個時候話鋒一轉，話現時漁農界風高浪急，政府又換屆，業界好多人都要求佢連任撐住大局喎。
咦？呢句「風高浪急」咁熟口熟面嘅？前日喺立法會答問大會上，經濟動力林健鋒（Jeffrey）先用呢句要求貪曾留任多一陣，行動簡直與民為敵，家吓根哥又照辦煮碗，係寸對方定係大家都借風高浪急作藉口呢？
講番黃容根想坐多一陣，據悉，黃同何俊賢分屬黨友，但並非同聲同氣。至於陳美德參選，根哥就話曾經搵過身兼經濟動力成員嘅鄉議局主席劉皇發傾過，但發叔似乎唔係好理，睇嚟漁農界呢場建制派內戰續有好戲上演。
