政壇：CY踐諾用人無分唐梁

候任特首梁振英（CY）喺特首選舉後呼籲各界放下歧見，CY雖然釋出善意，但唐營中人仍抱有懷疑，有人更聲言遭報復。尋日政府公布多個公職嘅任命，多名「深唐」人士獲政府續任法定機構公職，譬如「蘭桂坊之父」盛智文續任海洋公園主席兩年，而喺特首選舉期間擔任唐英年競選辦公室副秘書長嘅劉鳴煒，亦再度委任做海洋公園董事局成員，同樣係任期兩年。

盛智文已經擔任海洋公園主席九年，遠超過公職最多只做六年嘅不成文規定，佢之前都打定輸數，獲得再度委任後，盛智文話佢會繼續做到最好，搞好海洋公園，帶歡樂畀港人喎。除咗海洋公園之外，貿易發展局呢個重要機構尋日亦有動靜，唐英年嘅細佬唐慶年同撐唐者劉麥嘉軒，再獲委為貿發局成員，任期同樣係兩年，事前外界都有好多人揣測佢哋無得留低，如今續任，足見CY以事實證明一切。

CY尋日又分別同之前挺唐嘅工商及專業界別立法會議員會面，喺選舉中投白票嘅自由黨張宇人（Tommy）仲聯同一班飲食業龍頭同CY共晉午膳，據知會上唔少老闆向CY反映飲食業請人困難，要求CY考慮輸入外地勞工喎。