政壇：長毛潘佩璆互咒無得醫

立法會早前因為議席出缺安排嘅「拉布」令一大堆議程積壓落嚟，依家班議員就要日以繼夜、夜以繼日咁開會。尋日立法會開內務委員會時決定要開長命會救亡，不過，議員試過搏命開會之後都驚驚哋，社民連梁國雄（長毛）就建議請定啲醫護人員，以防有議員開會中途心臟病發暴斃，仲要搵埋心理醫生，費事有人能醫不自醫。呢句說話梗係招嚟還擊啦，工聯會嘅潘佩璆就暗諷有啲人「心腸唔好係無得醫」。

立法會內務委員會尋日傾嚟緊嘅開會時間，以處理政府架構重組等議程。長毛話班保皇黨為咗政府架構重組快啲通過，不惜連日開會係自甘作賤，仲揶揄建制派：「盡忠報國就有，盡忠報特首真係未聽過，仲要係候任嘅。」之前立法會拉布開會時，自由黨劉健儀（Miriam） 一度血壓高、幾乎暈低要送院，事後證實差啲中風咁滯，長毛就贈興咁話，嚟緊開會都要安排啲醫護人員，以防有人開開吓會心臟病發暴斃咁話。

長毛跟住仲燒埋喺「拉布戰」時成日「閉目養神」嘅潘佩璆，話擔心本身係精神科醫生嘅佢能醫不自醫，所以要請多五個心理醫生，費事出事。有人辣火頭，潘佩璆即刻還拖，話係要請多啲「外援」，如果唔係佢同啲醫生議員出咗會議廳救人時，又會有議員話唔夠人要響鐘點人數，揶揄長毛等人早前「拉布」響鐘點人數點到破立法會紀錄。

劉健儀打圓場

長毛咒議員暴斃同要睇心理醫生，潘佩璆就睇唔過眼、不甘示弱話「啲心腸唔好嘅人係無得醫」。作為內委會主席嘅Miriam見現場火藥味咁重，惟有打圓場話「你哋抬啲人入嚟會議廳救，我哋照計人數」。嘩，立法會議員開會開到急救都唔可以離開議事廳，呢次仲唔成為國際大新聞？