重振美食天堂聲威 豈能單靠廚藝學院

香港自稱美食天堂，盛名之下，其實難副。呢，消費愈來愈高，創意愈來愈少，邊度仲有食在香港呢支歌仔唱吖。唔怪得舊年國際旅遊網站評選亞洲最佳美食美酒旅遊目的地，香港輸畀曼谷咯。

菠蘿油不敵冬陰功，都咪話唔丟架。想重奪桂冠，梗要做多的工夫，職業訓練局向港府申請撥地，喺薄扶林附近興建國際廚藝學院，提供世界各地廚藝等課程，預計二○一五年竣工並招生。

開辦國際廚藝學院，對推動本港餐飲業發展肯定有積極作用。之不過咁，想重拾昔日光輝，淨係靠增加幾個大廚，睇怕作用有限。大家都知，香港美食天堂逐漸失色，除咗人才培訓跟唔上，仲有成本上升、缺乏本土特色等等因素。

大廚講實力，美食講特色，呢方面，香港同鄰近地區相比，簡直輸幾條街。嗱，澳門、日本、台灣、曼谷、內地，美食各有特色，令遊客樂而忘返。睇番香港，本土特色美食屈指可數唔在講，發展空間愈來愈窄，遲早變晒集體回憶。

餐飲業競爭力下降，特色美食買少見少，主要原因係經營成本不斷上漲。樓價飆升，租金失控，業界百上加斤，企得住已經偷笑。嗱，好似有啲米芝蓮星級食肆咁，一摘星業主即刻飛擒大咬瘋狂加租，攞獎變咗攞膽，問你點頂？

特色食品多數係小本經營，弊在當局對中小型食肆支持不足。好似申請食肆牌照咁，手續煩到抽筋，仲要牽涉多個政府部門，過五關斬六將，至少四十幾個工作天至搞掂，等得嚟蚊都瞓，蛇都死，乜嘢創意同特色都冇晒喇。

仲有吖，食物安全至關重要，有乜冬瓜豆腐，食肆嘅金漆招牌分分鐘一鋪玩完。弊在內地問題食品層出不窮，偏偏港府又監管失職，把關不嚴，甩漏不斷。你話嘞，食肆做得唔放心，消費者吃得唔安心，美食天堂點樣打響招牌吖？

計太一叮話齋，香港要重振美食天堂聲威，開設廚藝學院遠遠唔夠，要有相應嘅配套措施，為餐飲業界提供發展空間。最重要嘅係，香港唔止要有米芝蓮級富豪飯堂，仲要保留普羅大眾嘅飲食文化，鮑參翅肚加絲襪奶茶菠蘿油，百味飄香，各適其適，豐儉由人，咁先至係美食天堂吖嘛！