政壇：福建幫期待同鄉做特首

香港有唔少同鄉會，其中又以廣東幫、上海幫、福建幫勢力最大，最近新政府密鑼緊鼓籌組，福建幫就四出揀蟀晒人才畀新政府挑選，佢哋仲希望十至二十年後，本港會出一個福建人做特首添。唔講唔知，盛傳係文化局局長熱門人選嘅許曉暉就係福建人，極可能做下屆廉政專員嘅前入境處處長白韞六，據聞亦係祖籍福建。

我哋日前講過，福建幫打算推薦五人名單畀新政府，當中有唔少嚟自名牌大學，包括哈佛、劍橋同加州大學。福建社團聯會主席林樹哲話，依家正在挑選當中，佢對此感到好自豪喎，仲話香港有一百一十萬福建人，過去佢哋鍾意做專業界，唔熱衷做官，佢希望十至二十年後，福建人可以做特首。

不過，福建幫呢個終極目標短期內應該實現無期，事關有同鄉做特首嘅「上海幫」同「山東幫」甚至廣東幫都喺政界積極耕耘，要喺政界有出頭天，真係有排鬥。