政壇：鄉事派高達夾擊林鄭

新界村屋僭建問題近日似有一股和風吹送，先係鄉議局主席劉皇發放話，指收到發展局局長林鄭月娥嘅信件，暗示當局態度軟化；尋日鄉事派兩員大將又不約而同出席電台節目，仲分別放軟身段，話新界人無意同政府對着幹，大有你退一步、我讓一大步之勢。不過，一向主張市區新界僭建應相同手法解決嘅白鴿黨「高達」李永達就唔想林鄭軟化，尋日公開呼籲發展局嚴厲執法。睇嚟，夾在兩股大勢力拉扯中嘅林鄭做硬夾心人。

十年後清拆仍會有爭拗

鄉事派兩個地區鄉委會主席侯志強同梁福元尋日不約而同出席電台節目，兩個人都係鄉事派嘅高調分子，尋日卻態度軟化，認為村屋僭建一事應該協商解決。侯志強更話，新界村屋有悠長嘅歷史原因，問題好複雜，喺新界村屋僭建嘅問題上，政府應該同鄉議局繼續商討，搵出合理可行嘅解決辦法，而唔係一刀切，甚至強行清拆。

不過，出席同一電台節目嘅高達就認為，依家係發展局就新界僭建危險村屋執法嘅合適時間，因為好多僭建村屋都存在風險，雖然暫時未見有乜意外；仲認為就算政府延遲到十年之後至執法，到時仍然會出現政府同鄉事勢力嘅爭拗，而十年過去，可能湧現更多具風險嘅建築物。

佢哋一人一嘴，意見同立場卻南轅北轍，目的都係向林鄭施壓，一邊想政府軟化啲，一邊想政府強硬啲，無論新政府同林鄭將來用乜嘢尺度解決新界村屋僭建，總會得失一方，如果有望晉升為好打得司長嘅林鄭轉軚跪低，睇怕嚟自政黨同民間嘅壓力都唔細，唔想順得哥情失嫂意，今次就睇林鄭嘅手腕嘞。