打壓新聞自由 警方濫權斷正

警方濫用權力打壓新聞自由，仲砌辭狡辯掩蓋真相，卒之愈描愈黑，變咗玩火自焚。嗱，呢的就叫剃人頭者，人亦剃其頭嘞！

監警會日前公布舊年國務院副總理李克強訪港期間衍生投訴個案嘅中期審查報告，其中九項妨礙新聞採訪嘅指控全部成立，包括警務處處長曾偉雄以「黑影論」狡辯嘅警員手擋記者鏡頭投訴。公道自在人心，調查報告踢爆警方大話連篇，連禿鷹一哥都衰埋，呢鋪唔止斷到正，直頭斷到應一應，最少七名警員要受罰，死未。

係人都知，新聞自由係香港核心價值，警方身為執法者，冇保護傳媒採訪不特止，仲處處製造障礙，甚至粗暴對待記者，簡直匪夷所思。其實，今次事件只係冰山一角咋，當局近年打壓新聞自由無所不用其極，手段污糟邋遢，乜嘢招數都出齊。

傳媒職責係第一時間將事實真相話畀市民知，點知當局倒行逆施，絞盡腦汁限制傳媒採訪，由警方、消防到救護，一個二個「熄機」，話就話通訊數碼化，其實係阻止傳媒獲得突發消息來源。呢招好毒o架，傳媒獲得消息嘅渠道被切斷，火警等重要新聞只能靠當局「恩賜」，市民仲有乜知情權可言？

講到那渣招，仲有一樣叫借刀殺傳媒。當局早排失驚無神話要立法禁止纏擾行為，原來其中有蠱惑，諮詢文件話「沒有必要為新聞採訪活動另外提供免責辯護」，講白啲，即係記者盡忠職守採訪新聞人物，隨時會惹上官非，你話毒唔毒吖！最搞笑嘅係，政府新總部美其名「門常開」，其實對傳媒採訪諸多設限，「門常關」就真！

煲呔曾口口聲聲指言論同新聞自由係香港核心價值，點解將傳媒呢個「第四權」視為眼中釘？答案一字咁淺，因為佢其身不正，心中有鬼咯。煲呔曾「貪遍省港澳，歎盡海陸空」嘅醜聞被傳媒踢爆，梗係痛恨新聞自由喇！

煲呔曾上台以來，傳媒空間不斷收窄，新聞自由買少見少，再咁落去，遲早變成「一國一制」，同內地睇齊。有數字為證，本港全球新聞自由指數排名急降廿位，美國新聞自由報告將香港評為比內地好少少嘅「局部自由」，真係丟架。唔怪得有人話，煲呔曾治港七年，係新聞自由最黑暗日子，叮！