政壇：政商定格：鄺英志拍名廚搞靚酒宴

全球排名最高嘅華人品酒師鄺英志（Peter），經常幫襯城中著名私房菜館「尹師讌」嘅精緻粵菜，最近心血來潮同菜館老闆兼名廚尹達剛合作，以美國加州葡萄酒配菜。兩位星級人物首次雙劍合璧，雖然五月十八號先至有得食，但城中老饕已急不及待訂位一試為快。

今次星級特色菜單名為「曲水流觴」名仕讌，重溫唐朝名人雅士飲酒吟詩嘅雅興。旅居日本長達三十幾年嘅尹達剛返港後開設私房菜館，憑懷舊粵菜同日本懷石料理嘅「雙懷菜」闖出盛名，今次Peter以七款加州葡萄酒，配尹大師以極品烏魚子、北海道鱈場蟹等上乘食材炮製嘅佳餚，配酒由一百五十元至一千二百元不等，每席盛惠八千八百八十元。Peter最欣賞醬爆牛肉粒配○八年份嘅Petite Sirah紅酒，形容為酒席嘅高潮，果性澎湃嘅靚酒配濃郁嘅中式醬料，簡直係天作之合。