政壇：搞搞政：鐵定退休 鄧國斌7.1歎世界
七月新政府登場，官場音樂椅轉唔停，現年六十歲嘅審計署署長鄧國斌任期六月底屆滿，近日有傳聞話佢七月可能重返政府任廉政專員。查人無數嘅鄧國斌尋日就斬釘截鐵否認，強調暫時冇人邀請佢出任新政府任何職位，又話決定調查完貪曾豪花公帑外訪事件後就退休歎世界。
煲呔曾豪花納稅人血汗錢玩盡南美，畀人踢爆後仲裝模作樣，搵審計署覆檢特首嘅外訪做法。鄧國斌話審計署人員現正密鑼緊鼓搜集資料，暫時仲未得閒開會討論，但一定會趕喺五月底之前向特首提交報告喎。
鄧國斌九十年代喺廉署做過，對於被傳可能擔任回歸以嚟第七位廉政專員，佢直言冇聽過呢個傳聞，又話六月底退休後唔會再擔任公職。
設計圖片