政壇：田二少最後知囡囡好事近
新民黨副主席田北辰政商兩忙，但都盡量抽空陪太太同女兒，前晚演藝學院舉行籌款晚宴，田二少就一拖三出席，即係佢同太太帶埋兩個囡囡出席，佢仲賣口乖話自己帶咗三個女去，因為太太係大女喎，冧到田太好開心。
不過，講到囡囡係咪好事近，田二少就語帶怨氣，竟然話：「我諗我係最後一個先知！」咁有冇見過囡囡男朋友呢？佢話有機會咪見吓囉！至於婚期，田二少就認為後生一輩會自己控制時間o架喇，總之一切順其自然。田二少會唔會對未來女婿要求多多呢？佢話唔敢教囡囡揀男友，因為「我開聲話乜，佢會做相反」。