政壇：硬推乘車優惠貪曾博政績

就快執包袱嘅曾蔭權近排頭頭碰着黑，繼被踢爆接受富豪海陸空款待，以及欲以低於市價租住深圳東海花園一個六千三百呎嘅頂層複式單位後，又超豪公帑外訪，形象衰到貼地，偏偏政績又交唔出一星半點，惟有壓榨下屬為佢臉上貼金，勞工及福利局尋日斬件推出長者兩元乘車計劃，就同現屆政府想臨尾有揸拿有關。

兩元乘車優惠計劃一公布，就有知情人大鬧煲呔曾做嘢唔經大腦，只識下巴輕輕亂咁噏，因為計劃涉及好多複雜嘅技術問題，又要向立法會財委會排期申請撥款，最快要到今年下半年先至可以落實。結果長者望穿秋水，到尋日勞福局局長張建宗斬件宣布港鐵六月底首先參與計劃，九月中就輪到大部分巴士路線參與，算係有啲交代。不過，為邊個大家心知肚明啦，煲呔曾嘅政府就快玩完，兩元計劃臨尾有部分實現到，總好過得個吉吖！

害人不淺嘅煲呔曾仲有單衰嘢，佢租唔成深圳禮賓府後，累到業主黃楚標要重新招租，據講至今無人問津。黃楚標尋日同煲呔曾劃清界線，話大家其實唔係太熟，一年淨係見面兩至三次，仲話依家雙方律師仲處理緊解除租約嘅細節問題，包括煲呔曾撻訂要賠番幾多錢。

另外，冇碇住嘅煲呔曾據傳會喺七一後搬入細妹曾璟璇喺西半山干德道康苑嘅一個低層單位，黃楚標話如果係真嘅都係一件好事，因為起碼唔使被人話佢哋兩兄妹有利益輸送喎！