政壇：狙擊泛民流會 譚Sir被翻舊帳

九月就有新一屆立法會選舉，政黨都喺呢段時間踩低對手、博選民好感。日前立法會原定審議有關議員出缺安排嘅條例草案，但喺泛民杯葛、建制派護航不力下流會收場。一時之間，議會內外、螢屏上下都狂刮捉兇、懲蛇王之風，建仔主席譚耀宗（譚Sir）會後雖然成功搶佔主動權狠批泛民，甚至點埋名鬧人唔開會，尋日佢卻墮入畀人翻舊帳嘅陷阱，公開為當年製造流會認錯。到底係佢狙擊人，定係畀人伏擊呀﹖

杯葛參加五區公投議員

泛民當日各師各法杯葛會議，譚Sir事後好火滾，走出議事廳即刻鬧爆泛民議員，話有人寧願喺議事廳附近食早餐都唔肯去開會，又話睇見佢哋就眼火爆。事隔一日，政界同市民仍熱議立會流會時，建制派嘅攻擊力已大大減弱，有泛民議員更反擊話，建制派佔全體議員人數差唔多三分之二，唔齊人開會係佢哋嘅責任，有乜理由要賴晒泛民？

咁仲未完，建仔同時畀人翻舊帳，話佢哋前年為咗制止參與「五區公投」嘅泛民議員發表辭職宣言，專登拉大隊離席，同樣係製造流會啫。結果呢場流會嘅責任大火竟然燒番轉頭，譚Sir苦無支援下，更要死死氣為當年事件認錯，佢承認建制派當時都有做錯，但仍然死撐話上次會議差唔多已近尾聲，對社會冇造成太大影響喎。

點都好，建仔今次由狙擊泛民變咗畀人伏擊，新鮮嘅醜事發唔起，反而畀舊聞搞到要認錯，市民如果唔清楚件事來龍去脈，真係會以為建仔先至係罪魁禍首！睇嚟，建仔原本想喺立法會選舉前炒作議題、打擊泛民嘅如意算盤唔單止打唔響，仲畀人炸到滿地血添！