香港全靠第四權 牛鬼蛇神皆現形

係人都知，曾蔭權同李國寶係「曾兄弟」，佢哋唔止一齊歎世界，仲一齊爆醜聞添。一個因為貪腐而身敗名裂，一個就因為僭建而面臨刑責，呢鋪真係落難不離曾兄弟咯，叮！

大家可能會話，權貴僭建見怪不怪喇，煲呔曾、唐英年、鄭經翰，統統都係「曾朋友僭建營」一分子，李國寶一向唔執輸，僭建有乜出奇呀？嗱，佢僭建就唔出奇，奇就奇在屋宇署隻眼開隻眼閉，兩年來一直玩放生，如果唔係東方報業獨家踢爆，可能依家仲側側膊。

屋宇署點樣放生李國寶？件事係咁嘅，《太陽報》同《東方日報》上月踢爆李國寶山頂白加道豪宅僭建千呎天台屋，醜聞曝光大半個月，屋宇署終於承認，前年該署已經接獲市民舉報上址正興建天台屋，但就遲遲無採取行動，直到上年初先至發出清拆令。而最離譜嘅係，屋宇署發完清拆令之後就關人個關，並無跟進個案，直到本報揭發醜聞，該署先至向李國寶嘅僭建物業釘契，比發出清拆令足足遲咗一年有多，問你服未。

屋宇署仲死撐話，上年送交土地註冊處嘅清拆令，地段號數搞錯咗，到上月先至糾正錯誤喎。叮，咁幼稚嘅解釋邊個信吖！有立法會議員要求屋宇署公開紀錄，並且促請審計署徹查屋宇署嘅內部運作。咁就啱嘞，審計署查緊貪曾用公帑周遊列國租住總統套房，順便查埋屋宇署，話唔定李國寶僭建被放生，貪曾都有關連㗎。

大家知啦，煲呔曾同李國寶沆瀣一氣，高官權貴圍威喂，一齊坐飛機遊埠，一齊貪威識食歎世界，有福同享，今日曾兄弟有難咯喎，梗係有難同當啦。官商勾結，官官相衞，李國寶僭建獲放生，只係冰山一角嘅咋，都唔知仲有幾多醜聞未曝光呀！

話時話，李國寶醜聞多多，做立法會議員「三點不露」，以前甚至曾經捲入內幕交易醜聞，誠信破產，如果唔係曾兄弟，佢何德何能獲頒大紫荊勳章？佢兩個仔又有乜資格做太平紳士吖？無計啦，香港話就話三權分立，其實係三權互相包庇，從來冇人出來主持公道。好彩香港仲有正義傳媒，東方報業為民喉舌，不畏權貴，發揮第四權職責，監督政府，揭露醜惡，無論煲呔曾嘅貪腐，定係李國寶嘅僭建，統統無所遁形！

煲呔曾亂港七年，搞到烏煙瘴氣，令人稍為欣慰嘅係夕陽政府就快玩完，希望梁振英政府上場可以撥亂反正，將牛鬼蛇神一一掃走，叮！