政壇：政商定格：黃錦康唔做美聯教太極
提早辭任美聯副主席兼執行董事高職嘅Albert黃錦康，尋日開始恢復自由身，佢話想趁呢段時間休息下，調理好身體喎。講到過去三個月發生嘅事，佢話係人生最艱難嘅日子，除因阿仔嘅離開好傷心外，期間發生嘅「勞資糾紛」亦令佢好勞氣，因謠言嚴重影響個人聲譽，仲話一定會追究添，希望主席為佢澄清，還佢公道。
佢話好鍾意呢間公司及同事，未來亦會一樣咁錫，聽到佢哋組成「鐵三角」管理層（即主席黃建業、阿女黃靜怡、銷售總監黃子華）都好想了解下，美聯月底嘅股東會，佢話一定會去，仲話如果公司搞得好可能再入股。
提到自己成立咗十二年嘅股壇紅綠燈有限公司，佢話係專做企業管理同預測，近日都有唔少客戶接觸佢。佢話嚟緊想擺多啲時間係太極方面，開班授徒咁話。
黃錦康話自己間公司專做企業管理同預測。